Eit lyspunkt i jordbruksavtalen

Så kom ein i hamn med jordbruksoppgjeret i år også. Småbrukarlaget fekk si vane tru demonstrert si misnøye ved å bryte forhandlingane, mens eit bondefanga Bondelag måtte ta ansvar for å rette opp dei verste utslaga i tilbodet frå staten. Mykje har blitt sagt og skrive om resultatet av forhandlingane, og korleis staten sine strategar på briljant vis bondefanga Bondelaget. Me skal la det liggje her og heller ta for oss eit av lyspunkta i jordbruksforhandlingane.

For sjølv om totalen ikkje var noko å rope hurra for, så finst det trass alt noko der som det er verd å heise flaget for. Ja, for enkelte bønder kan gjennombrotet for ei maskinteknisk rådgjevingsteneste uavhengig av maskinbransjen, spare dei for meir pengar enn dei kunne ha drøymt om i eit gulloppgjer frå staten. For pengar spart er pengar tent, og for å tene pengar, treng ein gode råd når ein søkjer råd.

I sluttprotokollen i jordbruksoppgjeret står det at ein har sett av 1,5 millionar kroner til maskinteknisk rådgjeving i regi av Norsk Landbruksrådgiving. Rett nok står det også at tilskotet til dette føremålet skal trappast ned over fem år, men det må vere lov å håpe at me endeleg skal lykkast med å byggje opp ei rådgjevingsteneste for bønder som er uavhengig av maskinbransjen. Ikkje eit vondt ord sagt om alle dei flinke seljarane som gir råd når bønder skal investere i nye bygg og maskinar, men ingen kan vente at lojaliteten deira skal liggje hos bonden. For å setje det litt på spissen: Ein seljar si oppgåve er å leite fram det finaste og dyraste utstyret firmaet kan by på, og som du har sjansen til å betale for, og selje deg det.

Det har vore eit problem i Noreg at bønder har hatt få stader å søkje uavhengige råd. Når ein skal investere hundretusenvis av kroner i maskinar, for ikkje å seie mange millionar kroner i bygningar, i-mek og maskinar, kan mange ha stor nytte av å rådføre seg med ekspertar som ikkje tener pengar på å selje bonden den eine eller andre løysinga.

Kjell Mangerud er blant dei som har kjempa for ei uavhengig maskinteknisk rådgjevingsteneneste i mange år. Nå har gjennombrotet endeleg komme. Utfordringa nå er korleis me kan komme vidare. Det neste steget må vere å byggje eit kompetansemiljø som kan utdanne og rettleie ekspertane. For dei uavhengige ekspertane må jo komme frå ein stad, og den staden har me ikkje i dag. Det mest nærliggjande er å satse på Blæstad.