Gratis tips

Skjønt, om ein ser på mange av maskinane som finst i det norske landbruket i dag, er det ein god del av dei som blei vurderte som uaktuelle i Noreg berre for få år sidan.
Det er også gøy å vere til stades på grasdemonstrasjonar. Sjølv om maskinleverandørane har ein tendens til å vise fram dei største og gjevaste maskinane først, viser dei sjølvsagt også fram maskinar som er midt i leia for den jamne norske bonden og entreprenøren.

I år hadde Forum Ku på Jæren invitert landbruksmaskinbransjen til ein felles grasdemonstrasjon. I staden for at Felleskjøpet inviterte sine potensielle kundar til grasdemo med utstyr frå sine leverandørar, Eiksenteret med sine leverandørar og Lantmännen med sine og så vidare, var alle samla på nøytral grunn på Nærbø. Der fekk me sjå alt frå Claas og New Holland sine sjølvgåande finsnittarar, til meir vanlege syn som slepeslåmaskinar frå Kuhn og Kverneland og rundballeutstyr frå Orkel og Krone. Her var alle samla på nøytral grunn på Nærbø.

Det blei ein svært vellykke grasdemonstrasjon. Kanskje med unntak av kvaliteten på graset, og at utfordringa for ein del av maskinane dermed blei vel tøff. Eit heftig regnvêr dagen og natta før gjorde nemleg at ingen andre enn demokjørarane vurderte noko slåttonn den dagen. Elles ville nok den tidlege våren gjort at svært mange heller ville ha prioritert å få eige gras i silo eller ballar.

Ulempa når ein skal vise fram veldig mange maskinar, er naturlegvis at det ikkje blir tid til å demonstrere maskinane grundig. Vêret gjorde også at det ikkje blei noko av dei planlagde prøvekjøringane etter at sjølve demoen var over. Det var det rett og slett for bløtt til.

Fordelen med ein felles grasdemo var sjølvsagt at ein fekk sett mange ulike maskinar i aksjon, og at ein dermed kunne samanlikne prestasjonane. Ein glimrande idé, som veldig mange sette pris på, både blant dei som viste fram maskinar og dei som var der for å sjå på.

Tanken om å samle landbruksmaskinbransjen til ein felles grasdemonstrasjon, kom etter eit liknande arrangement med fullfôrvogner i fjor. Leiaren i Forum Ku, Bjørn Høyland, fortel at dei neppe vil ta på seg å arrangere ein tilsvarande grasdemonstrasjon neste år, men at det kan bli ein demonstrasjon med eit anna tema.

Men ideen og gjennomføringa var etter underteikna si meining så god at felles grasdemonstrasjonar, og andre fellesdemonstrasjonar for den del, er noko ein bør vurdere både på Jæren og andre stader i landet. Det var rett og slett eit glimrande tiltak. Tipset frå Forum Ku er gratis.