- Biobrensel skadar ikkje matproduksjonen

Me kan ikkje diskutere matvarer kontra energi. Brensel er ikkje ein luksus for samfunnet. Det seier den anerkjende forskaren til den danske nettstaden ingeniøren.dk

- Det er ei myte at dyrking av planter til biobrensel vil leggje beslag på så store areal at det vil gå ut over produksjonen av matvarer til ein stadig veksande befolkning, seier Vibe Schiller, som leiar eit stort amerikansk forskingsprosjekt i biodiesel ved det amerikanske Joint BioEnergy institute (JBEI).

Den danske forskaren viser til at ein ved å bruke fem prosent av jordbruksarealet i USA kan dekke 35-50 prosent av landet sitt brenselforbruk, slik USA satsar på. Henrik Vibe Scheller meiner at det er feil å velje mellom mat eller brensel.

- Me må ha begge deler. Energi er ikkje luksus. Eg kan i alle fall ikkje førestille meg eit samfunn som ikkje bruker brensel. Det veit eg heller ikkje om nokon av dei som kritiserer biobrensel er i stand til. Skal me tilbake til steinalderen, spør han.

Kva er problemet om prisane på mat stig når det blir dyrka planter til biobrensel i staden?

- Det synest eg er ein underleg diskusjon. På den eine sida subsidierer politikarane både i USA og Europa landbruket fordi bøndene elles ikkje kan leve av produksjonen. Politikarane subsidierer også den nye bruken av plantene, og då er det jo klart at om in aukar etterspurnaden etter planter inneber det implisitt at det er eit mål at prisane skal stige. Det seier ein sikkert ikkje til veljarane, men det må det jo nødvendigvis gjere. Når prisane faktisk stig, og bøndene er nøgde, seier politikarane at det er forferdeleg. Men det var jo eit forutseibart og sannsynlegvis eit ønska resultat av den politikken ein har ført, seier Vibe Scheller.

Den danske forskaren meiner at ein ikkje kan få både det eine og det andre. Han kritiserer politikarane for å ha laga eit system med subsidiering av det vestlege landbruket, der maten blir så billeg at ein hindrar utviklinga av landbruket i andre deler av verda.